ശകുനം

വീട്ടീന്നു പുറത്തേക്കിറങ്ങും നേരം
കട്ടിളപ്പടിയില്‍ കാലൊന്നുടക്കി
ക്ഷണനേരം കഴിഞ്ഞിറങ്ങാം
വിഘ്നമൊഴിഞ്ഞോട്ടെയെന്നമ്മ..

അല്പദൂരമൊട്ടു നടന്ന നേരം
കരിമ്പുച്ചയൊന്നു കുറുകെ
ദുശകുനമാണല്ലോ ഉണ്ണീ-
യെന്നു കളിത്തോഴന്‍ ..

രണ്ടടി മുന്നോട്ടായവേ, തലനരച്ച
കാളിതള്ളയല്ലേ വരുന്നത്
അവര് പോയിട്ടാകാമെന്നു
അയലത്തെ സാവിത്രി..

നിറജലകുടവുമായ് പാറുക്കുട്ടി
തെയ്യം തെയ്യം വരുന്നുണ്ട്.
ശുഭശകുനമാണ്, യാത്ര-
തുടരാമെന്നങ്ങേലെ ബാലേട്ടന്‍..

കേവലം ശകുനത്തിലെന്തു കാര്യം
എല്ലാം മനസ്സിന്റെ നന്മയല്ലേ.
കരിമ്പുച്ചയോ,കാളിതള്ളയോ...
ഇതിലെന്തു പിഴച്ചു.....?

**************************